27 C
Hong Kong
Friday, March 29, 2024

車事短評:蘇師傅上身?2012 車界大預測


蘇民峰蘇師傅幾乎係香港人都識啦,而蘇師傅最出名就係術數命理,簡直係料事如神!盧蘇我想拜佢為師,恐怕就連「門都沒有」。不過,拜唔到師都可以一廂情願咁做佢 fans 嘅!既然盧蘇我都有一個「蘇」字,即係同蘇師傅多少都算有緣,等我盧某人今次充當做一次「蘇師傅」,幫香港車界睇睇來年運程!

一開始不如講下好野先啦!2012 年壬辰年,根據九宮飛星圖,今年八白,財星正西方。預料有行運 多數都係「西方」嘅歐洲車廠同代理啦!雖則話人地老家歐債危機隨時爆煲,但係人地勝在根基夠厚,設計生產嘅汽車永遠勝人一籌,日韓中印唔恨得咁多架啦。歐債危機都不過係代表之前駛突左,萬一真係違約,地球都唔會唔轉,寶馬法拉利亦唔會忽然係地球上消失嘅。一個唔覺意如果歐元貶值,去番當年同美金一兌一左右,都時香港人人渣歐洲車,都未必係天方夜譚。

咁另一邊又點呢?今年九紫,喜慶星原來係東北方,都係主嫁娶添丁創業升職之類啦,照咁睇「 東北方」既日韓車廠同代理,又好似衰唔哂喎。雖然日圓高企,經濟上的確不利出口,相信大家都有眼睇,日本車價真係愈升愈有 。不過,平唔一定係好,貴亦未必唔抵,係咪?喜慶星既然主嫁娶添丁,可以係代表公司之間會有重大既合併或合作。透過合作既創新科技或突破設計,隨時可以為日韓車系帶來 轉機都未定!就算唔係收購合併,請個猛人過檔都可以應「嫁娶」之兆。大家記唔記得,韓國 Kia 係 06 年時請左前 Audi 既 Design 猛人 Peter Schreyer 加盟,近兩年既 Kia 車外型係咪升哂呢先?

咁今年車主又有無野要注意下呢?今年有西北七赤破軍,正北二黑病符,東南五黃災瘟,除左渣車出門幾時都要小心之餘,仲要留意停車熄匙新例,2011 年 12 月 15 日正式生效啦!唔想破財或者 同阿 Sir 爭執嗌圾,就真係要小心。咁又有無化解既方法呢?梗係有啦!我地要諗番,停車唔熄匙既原因,一係想吹冷氣,一係就唔記得。化解既方法就係換電動車,或者換有停車熄引擎系統(Idling Stop System)既新款汽油車亦得!換車之後停車就會熄埋引擎,甚至乎無引擎無排放,咁就可以印印腳開 冷氣,又唔驚食牛肉乾啦!

最後,盧蘇祝廣大車主開開心心健健康康,今年賺多啲就齊齊有錢換新車啦!請請!

盧蘇
Car1.hk《車事短評》專欄作者

(以上純屬作者個人言論及創作,並無科學根據,亦不代表本公司立場。)

相關內容

最新內容