車事短評:國民教育大閘蟹


最近看了一篇報導,指德國易北河有純種正宗大閘蟹出產。請容許盧某人在此講一個關於大閘蟹既故事。

香港人向來喜吃陽澄湖大閘蟹,然而早有報告指出,大閘蟹年產量只不過佔全國百分之四左右,那市面上名貴的「大閘蟹」(尤其是在內地),有幾多係如假包換既真貨?天曉得!一個唔覺意隨時買左成籮河蟹返屋企都唔知。

偏偏我地既阿爺就十分推崇膽正命平既河蟹,仲同我地呢班做仔做孫既推廣,建設河蟹社會。一時北水南調,一時又自由行,結果令我地慢慢對往日的光景同印象逐漸模糊。試諗下餐餐都人仔焗河蟹俾你食,個人想唔「河蟹」都幾難啦!

十五年來,河蟹在香港算係吃得開,阿爺大喜,決心要令全家人都「河蟹」哂,更加規定小朋友要由小學階段開始食河蟹。Oh my god!終於有人覺醒,一來河蟹唔係大閘蟹,二來河蟹生長既地方其實污染嚴重,仲隨時有毒!於是就有中學生同小孩家長奮起,堅拒餵小朋友食河蟹。其實,他們的訴求都只是想當局,可以保證食用蟹能通過香港人相信的普世價值檢測。不過,他們偏偏發現了兩件事:

一、阿爺有份資助既「中國模式國民食譜」中,表明偉大的共橙糖是一種能令人進步,無私及團結的添加劑。
二、由阿爺欽點,幫我地泡製河蟹菜式的御廚們,原來佢地從來唔俾自己既小朋友食河蟹,反而送哂出去外國,可以任食正宗大閘蟹!

講到呢度,我希望出哂名現實既香港人,係時候要現實一點,面對香港核心價值逐步消失,the city is dying 的現實,起來做些表示,否則當香港再無香港人,就好似大閘蟹一樣,要去外國先搵得番,到時就太遲啦!

最後,特借網友 Facebook 的相片 Share,呼籲大家可以在車上綁一條小小的黑色絲帶,用意提醒街上的車主同路人「保後代反洗腦」的訊息,洗腦式國民教育一日不撤回,讓黑絲帶繼續飄揚!

盧某衷心希望下年換車前,我可以將車上的黑絲帶除下。

盧蘇
Car1.hk《車事短評》專欄作者
(以上純屬作者個人言論及創作,並無科學根據,亦不代表本公司立場。)

(圖片來源:網上圖片)

其他人感興趣的新聞:

視像新聞
» 更多
車街搜奇
客戶車盤推介