塞車，一直是全球駕駛者的惡夢。美國統計數據顯示，一個人每年平均要浪費差不多一星期時間困在交通之中。Nissan 最近就同加州大學柏克萊分校（UC Berkeley）及當地交通機構合作，展開一項極具突破性的「Cooperative Congestion Management」（簡稱 CCM）實驗，目標係透過汽車之間的通訊，減少塞車、提升安全。
外型同技術背景
是次試驗車款主要採用 Nissan 已有的 ProPILOT Assist 半自動駕駛技術。系統結合鏡頭及雷達感測器，再加上新開發的「車對車通訊」功能，令汽車之間可以互相分享交通流量數據。測試期間主要用到 Ariya 等新世代車型，透過「探路車」向後方 30 至 60 秒距離的車輛提供路況，讓後方車隊提早減速，避免出現人類司機慣性「追貼」再急煞的情況。
測試結果震撼
在美國三藩市灣區最繁忙的 I-680 高速公路進行 600 英里測試後，結果顯示：急煞車事件減少 85%，停車時間減少 70%。換句話講，交通流動性大幅提升之餘，後車追撞風險亦同時降低。電腦模擬更顯示，若大規模應用，行車時間可縮短 18%，燃油效率提升高達 42%。對一個長期受塞車困擾的城市而言，這絕對是一種革命。
人性化挑戰
不過，要將技術推廣到全民使用，仲有唔少心理關口要過。當測試車輛自動減速時，有司機會出於直覺想「補位」，令系統效果打折扣。Nissan 研究團隊就指出，未來需要透過更清晰的介面提示，教育駕駛者明白為何系統會慢下來，從而建立信任感。畢竟，車與車之間嘅合作，需要人類司機同樣願意配合。
對通勤族而言，若 CCM 技術普及，意味返工返學少咗「塞死」嘅時間，生活質素自然提高；對政府與交通管理部門，這代表減排、提升道路使用效率的重大契機；而對汽車品牌，能將自家半自動駕駛系統升級為「交通協作網絡」，更係一個行業領先的標誌。
Nissan 今次實驗雖然仍處於初階，但已經證明「車會傾偈」係真有潛力解決塞車問題。香港每日繁忙時段的獅子山隧道、紅隧口景象，幾乎人人都熟悉，如果 CCM 有朝一日能夠普及，唔單止慳時間，仲有助減低尾隨碰撞事故。當然，香港道路環境複雜，司機心態又相對急躁，要全面落地仍然困難重重。但正如智能手機初期都有人懷疑，如今卻無人離得開，智能汽車互聯未來或會成為新常態。到時候，塞車可能真係會變成歷史名詞。
