小米 Xiaomi 15週年冇出手機，反而再下一城殺入SUV市場！繼SU7電動房車成功起勢之後，創辦人雷軍親自公開品牌首部電動SUV —— Xiaomi YU7，從內到外都夠晒誇張，配備超跑級加速、豪華內櫳、835km超長續航，更標配Lidar自動駕駛系統，明顯係為挑戰頂級電動SUV市場而來。
YU7屬中大型SUV級別，尺寸接近5米長、2米闊，再加上3,000mm軸距，比例十分霸氣。外觀設計承襲Xiaomi家族語言，配上電動內藏式門柄及氛圍燈設計，配UWB超寬頻技術，支援手機遙控解鎖及尾箱開關。車身共提供9種顏色選擇，包括哥倫比亞祖母綠、金屬鈦橙等極富未來感的配搭，輪圈則有19或20吋版本選擇。
入到車內，一眼望去就知「堆料堆得唔手軟」。全車真皮包裹，前座採用Nappa皮「零重力」座椅，支援123度傾斜角＋10點按摩功能，後排亦有135度電動調校及獨立6.68吋觸控屏幕，乘客可以獨立操作冷氣、音樂及導航。
最大焦點莫過於1.1米闊的「HyperVision」中控屏，三塊Mini LED組成，達到108 PPD視網膜級解像度，所有駕駛資訊、多媒體、盲點顯示都可自定顯示，連widget都可以玩自定。中樞運算由Snapdragon 8 Gen 3晶片支援，開機只需1.35秒，支援15分鐘OTA更新，幾乎係手機規格上車！
每部YU7都採用Xiaomi自家800V矽碳高壓平台，配V6s Plus高效摩打，同級罕見支援5.2C超高速充電，15分鐘可以充入620km續航，基本等於「食個早餐就出得發」。
Xiaomi與科研機構共同開發車架，使用2,200 MPa超高強度鋼製成一體式防滾籠設計，配合20合1鋁合金壓鑄前框架，以及鋼鋁混合「裝甲籠」車身結構，加上子彈級抗衝擊電池包，已進行超過50項被動安全測試。
同時全車標配Lidar、4D毫米波雷達、NVIDIA Drive AGX Thor晶片（700 TOPS）、ALD抗反光鏡頭，加持自研全場景自動駕駛系統。雷軍誓言打造最安全、最可靠的自動駕駛方案，亦可見今次Xiaomi對汽車未來押注有幾重。
對Xiaomi入局汽車一開始都有懷疑，但經歷SU7，再到今次YU7，我感受到佢哋並唔係玩票性質，而係認真用科技與設計去挑戰傳統豪車界。尤其今次YU7每一個細節都見到佢哋對「完美科技汽車」嘅追求——從三塊Mini LED屏幕、按摩座椅，到子彈抗性電池包，處處都係驚喜。
當然，Xiaomi仲未交出YU7真車實測表現，但以目前曝光嘅資料嚟睇，呢部車將會成為中國電動車新標杆。7月正式發佈時，定價會唔會再拋出驚喜，可能就係佢成敗分水嶺。
