香港電動車用家經常面對一個煩惱：唔係冇充電站，而係冇得快又穩。針對呢個痛點，Mercedes-Benz 正式喺數碼港設立全新快充站，並引入先進「動態充電技術（Dynamic Charging）」，打正旗號要提升南區電動車主嘅整體充電體驗。
數碼港平治快充站設有七個充電位，包括兩部 60kW 直流快充器（配備四支充電槍），及三個 11kW 交流掛牆式充電箱。當中最大亮點，係直流快充器具備「動態電力分配」能力。當只有一部車接駁時可獨享 60kW 功率，多車同時充電時，系統會自動智能分流，確保每部車都唔會「分分鐘得返5kW咁少」。
此設計大大縮短充電時間，又唔會出現浪費電力情況，特別適合繁忙時段使用，靈活度高，效率亦比傳統死板式快充優勝。
平治亦推動數碼體驗，透過自家「E-MBility」手機程式，用家可即時查閱充電狀態、埋單付款，便利程度接近 Tesla Supercharger 等級。已驗證用戶仲可透過仁孚行獲得優惠碼升級賬戶，享有折扣。非平治車主一樣有得用，只要帶定八達通或信用卡（支援Visa、Mastercard、AE）即可落場充。
數碼港呢個站位於 2 座 2 樓 243-249 號車位，亦係平治首個喺港島南區設立嘅直流快充站。地點極具策略性，鄰近大型住宅群、科技園區及行山熱點，方便週末郊遊充電同時打卡。
