香港松田自動車友會九週年會慶(Fans Club of Mazda Hong Kong)


Fans Club of Mazda Hong Kong(香港松田自動車友會)九週年會慶聚餐,在攝氏 35 度高溫低下,二十多部不同款的萬事得在元朗集合,有家庭房車,又有跑車,眾車主因為喜愛萬事得而走在一起,整整齊齊排列好,影一張一年一度的大合照,鐘意車就係咁簡單。


會員選擇萬事得的原因都各有不同,但大部份都認為近年萬事得比以前進步不少,不論內籠及外觀上,都已經可以同歐洲車相提並論;至於舊款萬事得亦有一班忠實 fans,四出搜尋改裝料,都係為了幫愛車打扮一下,證明俾外間睇,萬事得都有好多可取之處。


Robert 熱愛飄移,咩原因會令佢揀 Mazda MX-5?Robert 表示在香港路面,大馬力車難以發揮,相反馬力小,操控好的尾驅車樂趣和挑戰性更高。其實萬事得唔只得家庭房車,想輕巧靈活,可以揀 MX-5,想感受馬力同速度感,可以揀萬事得獨有的轉子引擎 RX-7 同 RX-8,想玩 SUV,都可以揀近期熾熱既 CX-7,唔講唔知,原來萬事得都有咁多選擇,不過佢話,最緊要加入松田車友會呢個大家庭。



MX-5 在尾驅車潮流影嚮之下,近年好多玩車一族都將 MX-5 收歸其下,雖然馬力在數字上並不起眼,但由於車身輕,加上第一代的經典跳燈同開蓬設計,都吸引到唔少途人眼光。


Elton 架 Mazda Spiano,其實只係半部萬事得,事因呢部其實係 Suzuki Lapin,在香港絕對係稀有,又有咩原因令佢將 Suzuki 變為 Mazda 原因好簡單,就係鐘情於萬事得,擁有過 MX-5 的 Elton,都認為 Mazda 先係至合他心水,Elton 亦表示,走可愛路線的車主,未必要買Mini Cooper,Mazda Spiano 都可以係你地杯茶。



大合照完,會員紛紛出發到聚餐地點,吹水既吹水,玩 GT5 既都有。晚飯的高潮當然係大抽獎,經過幹事既細心挑選,桌面上的禮物都令眾會員流口水,獎品大部份都係汽車模型同玩具車仔,適合眾會員口味,重有贊助商送出禮物,目不遐給。全晚氣氛非常熱鬧,會員都盡興而歸,不過未夠喉,由於餐廳環境非常優美,會員決定黎多一張大合照,更加搵黎白馬王子RX-8做背景,一絕!


Fans Club of Mazda Hong Kong 簡介
一群活躍於網上新聞組的萬事得汽車愛好者,都希望可以聚在一起加強聯繫,從而可更密切地交流駕車、保養等心得並最終提高道路安全。 終於香港松田自動車友會於 2002 年 8 月 4 日正式宣告成立。

萬事得品牌的自用車在香港數量一直都在前列位置,而假若能有一個組織可以讓同一品牌的自用車聚首一堂,讓各車主或駕駛者能暢所欲言,甚或統合大家的力量進而爭取更大的利益,這也是車會成立的目的。我們希望各位萬事得的愛好者能加入、交流分享,將來攜手共進。

文:Kaho
攝:Elton、Kaho
鳴謝:Fans Club of Mazda Hong Kong
網址:http://www.mazdaclub.org.hk

香港松田自動車友會九週年會慶圖片集

「Car1.hk 圖片集」 小密技:當我們把相片放大後,可以用 滑鼠中央的轉盤 (Mousewheel) 或鍵盤 左← 右→ 鍵跳到下一張相,極之方便。

其他人感興趣的新聞:

視像新聞
» 更多
車街搜奇
客戶車盤推介