兜搥窩爆眼、監生斬甩手、利刀劏爛肚、飛腳踼斷頭，仲有最令男人生不如死嘅猴子偷桃，招招陰毒吓吓攞膽，盡在重口味武打Cult作《鐵拳無敵》！皇帝下令將大批黃金運去北方，惹起獅子、豺狼、黑寡婦等幫派虎視眈眈，終於爆發獸性盡現嘅血腥大混戰！本片除有金像影帝羅素高爾坐陣，更有劉家輝、陳觀泰、梁家仁、吳彥祖等香港紅星型爆參演！
邵氏經典武打片震驚國際影壇，威力無遠弗屆睇到鬼佬如痴如醉，其中一個自細俾人洗腦嘅Fans，必數拍過《落水狗》、《危險人物》、《標殺令》等神級Cult作嘅昆頓塔倫天奴（Quentin Tarantino）！
今次係佢愛徒RZA﹙饒舌組合”The Wu-Tang Clan”﹙武當派﹚成員，之前曾為《標殺令》配樂﹚處男編導嘅《鐵拳無敵》，就獲得塔倫天奴出名相助，而RZA亦秉承塔倫天奴的風格，務求有咁血腥得咁血腥，有幾玩嘢得幾玩嘢，不求情理，只求過癮，向邵氏一眾武打經典致敬。
《帝國驕雄》金像影帝羅素高爾（Russell Crowe），無啦啦為乜會喺古代中國四圍騰？唔係嚟旅遊，而係有重要任務在身！中原皇帝恐防批黃金俾人老笠，而由佢飾演嘅「刀先生‧阿積」﹙Jack Knife﹚則以大英帝國密探身份展開追查，期間不但同《神探俏驕娃》劉玉玲（Lucy Liu）飾演嘅「粉花樓」老闆娘有過幾手，仲遇上嚟自三山五嶽、各有獨門必殺技嘅武林高手，而且好多個樣都熟口熟面……
