一直盡責保衛地球的「黑超特警組」今次遇到大麻煩！特務O﹙愛瑪湯遜 飾﹚急急腳找來經驗老到的特務H﹙基斯咸士禾夫 飾﹚，加上MIB強勢新手特務M﹙泰莎湯遜 飾﹚一齊查明真相。兩個由倫敦出發，去到世界各地追查真兇，卻意外發現敵人的爪牙已滲入MIB內部！整個組織將被動搖之際，呢對最佳拍擋究竟能否及時解除危機，捍衛整個宇宙？
Fans苦等七年，「黑超特警組」終以全新組合爆炸性回歸，話俾大家聽智勇雙全唔止「Men In Black」，查實「Women In Black」一樣好叻叻！
系列第四集《黑超特警組：反轉世界》，由《狂野時速8》﹙The Fate of the Furious / Fast & Furious 8﹚大導加利格雷﹙F. Gary Gray﹚操刀，夥拍宇宙萬人迷基斯咸士禾夫，要佢一邊冧女﹙涵蓋所有雌性生物﹚，一邊完成各項艱鉅特殊任務，包括帶領新入職嘅小師妹泰莎湯遜，攜手玩轉紐約、摩洛哥、意大利、倫敦甚至外太空，實行孖咇辣更救地球。
除了配搭新鮮的男女主角，《救參96小時》﹙Taken﹚系列最強老豆里安尼遜，亦會飾演MIB倫敦分部領導High T，而《特務戇J：神級歸位》﹙Johnny English Strikes Again﹚愛瑪湯遜也會擔綱Agent O一角，齊齊組成新人事、「辛」作風的非常特工隊，狂掟笑彈炸到各路異形攤攤腰！
